Lev 14 | ZomZIV | STEP | TOPA in Moses tungah,

Leviticus 14

Kilawhthei Vunnatna pan Sianna

1 TOPA in Moses tungah, 2 “Hihte in siampipa mai-ah cinate kipaipihin a kisiansuah hun cianga zat ding ngeinate ahi hi: 3 Giahphual pualam ah siampipa paikhia-in amah veel ding hi. Tua mi a kilawh thei ama vunnatna ^{▼▼14.3 Tang ngeina-in phak; Hebrew kamin phak cihna hi loin vun natna nam khempeuh genna ahi hi.} a dam khit leh, 4 mi khat sian nadingin siampipa in a nungta vasa a siang nih leh tamtak sing pawlkhat, a-ausan khau le puknah a lasak ding hi. 5 Tua ciangin siampipa in tua vasate khat, leibeel a tuisiang tungah gosak ding hi. 6 Tua ciangin amah in vasa a hing lai pen la dinga, tuisiang tunga kigosa vasa pen sisan sungah tamtak sing, a-ausan khau le puknah tawh diahkhawm ding hi. 7 Amah in tua a kilawh thei natna a vei pen sagih vei theh dinga tua ciangin amah siang hi, ci-in pulak ding hi. Tua ciangin amah in vasa ahing lai pen gamlakah a khah ding hi. ^b

8 “A kisiangsak ding mi pen in pel loin a puan sawpin a mul khempeuh metin tui-in kisil ding hi; tua ciangin amah a siangin kiseh ding hi. Tua teng khit ciangin giahphual sungah lut thei dinga ahi hangin ama puanbuk pua-ah ni sagih sung a om pelmawh ding hi. 9 A ni sagihna ni-in a mul khempeuh met pelmawh ding hi; amah in a lu, a khamul, a mitkhu-mul le a mul dang khempeuh met ding hi. Pel loin a puansilhte sawpin kipumsil dinga tua ciangin asiang hi ding hi. ^c

10 “A nigiat ni-in amah in a sitbaang lo kum khat a pha tuuno apa nih le anu khat, le an-a biakna dingin sathau tawh helsa annel limci ephah ^{▼▼14.10 Tua in quart 16 bang hi thei ding (litre 6.5 bang)} khat sehsawm suah sehthum le sathau bingta ^{▼▼14.10 Tua in pint 2/3 bang hi thei (litre 0.3 bang); tang 12,15,21 le 24 ah zong} khat tawh a paipih khawm ding hi. 11 Amah in siang hi, ci-a a pulak siampipa in a kisiangsak ding mi le a biaknate Kikhopna Puanbuk lutna TOPA mai-ah a pia ding hi.

12 “Tua khit ciangin siampipa in tuu-pano khat la dinga sathau bingta khat tawh khialhna biakna-in a piakhawm ding hi; amah in TOPA mai-ah vei-a biakna-in tuate a vei ding hi. 13 Amah in tua tuuno, mawhna hanga biakna le meihal biakna gawhna mun siangtho ah a go ding hi. Mawhna hanga biakna mah bangin khialhna hanga biaknate siampite aa hi-a, a siangtho pen ahi hi. 14 Siampipa in khialhna hanga biakna sisan pawlkhat la in a kisiangsak ding mi taklam bilhual tung, a taklam khutpi tung le a taklam khepi tungah nuh ding hi. 15 Tua khit ciangin siampipa in bingta pana sathau la dinga ama veilam khutpek sungah sungin, 16 a khut sunga sathau lakah a taklam khutme-lai diahin a khutme tawh pawlkhat TOPA mai-ah sagih vei a theh ding hi. 17 Siampipa in a khutpek sunga a om lai sathau, a kisiangsak ding mi taklam bilhual, a taklam khutpi tung le a taklam khepi tung, khialhna hanga biakna sisan tungah nuh thuah ding hi. 18 Siampipa in a khutpek sunga om lai sathau pen a kisiangsak ding mi lutung ah koih dinga ama adingin TOPA tungah thoihdamna a bawl ding hi. ^f

19 “Tua ciangin siampipa in, sianlohna pan a kisiangsak ding mi thoihdamna bawlin mawhna hanga biakna a pia ding hi. Tua khit ciangin siampipa in meihal biakna go dinga, 20 an-a biakna tawh biakna-tau tungah piakhawmin ama adingin thoihdamna bawlin, tua ciangin amah a siang ding hi.

21 “Bangbang ahi zongin amah zawngin hihte a neih zawh keileh amah in a pel loin ama ading thoihdamna bawlna-a vei ding, khialhna hanga biakna adingin tuuno apa khat tawh, an-a biakna dingin annel limci sathau kihelsa ephah ^{▼▼14.21 Tua in quart 2 bang hikha ding (litre 2 bang)} khat sehsawm suah sehkhat, sathau bingta khat tawh, 22 le ama neih zawh ding vakhu nih ahikeh kawlvakhu nih, mawhna hanga biak nading khat le a khat pen meihal biakna dingin a tawikhawm ding hi. ^h

23 “A nigiat ni-in amah in a sian nadingin Kikhopna Puanbuk lutna TOPA mai-ah siampipa a puak pelmawh ding hi. 24 Siampipa in khialhna hanga biakna dingin tuuno le sathau bingta lakhawm dinga vei-a biakna-in TOPA mai-ah tuate a vei ding hi. 25 Amah in khialhna hanga biakna dingin tuuno go dinga a sisan pawlkhat la-in a kisiangsak ding mi taklam bilhual tung, a taklam khutpi tung le a taklam khepi tungah a nuh ding hi. 26 Siampipa in a veilam khutpek sungah sathau pawlkhat sung dinga, 27 a taklam khutme-lai tawh a khutpek sunga sathau pawlkhat TOPA mai-ah sagih vei a theh ding hi. 28 Amah in a khutpek sunga sathau pawlkhat pen khialhna hanga biakna sisan a nuhna mun teng - a kisiangsak ding mi taklam bilhual, a taklam khutpi tung le a taklam khepi tungah a nuhsak ding hi. 29 Siampipa in a khutpek sunga a omlai sathaute a kisiangsak ding mipa lutungah nuhsak dinga, TOPA mai-ah thoihdamna a bawlsak ding hi. 30 Tua ciangin amah in a kisiangsak ding mi neih zawh bangbang vakhu ahikeh kawl-vakhute biakna-in pia dinga 31 khat ^{▼▼14.31 Septuagint le Syriac; Hebrew 31 tua bangin mipa in a khat a piaksak ding hi.} mawhna hanga biakna, a khat pen meihal biakna-in an-a biakna tawh a piakhawm ding hi. Hici bangin siampipa in a kisiangsak pen tangin TOPA mai-ah thoihdamna a bawlsak ding hi,” a ci hi.

32 Hihte in a kilawh thei vun natna a vei peuhpeuh, ama sian nadinga biak nading zah a pia zo lo peuhmah kisiansak nading ngeinate ahi hi.

Ap pana Siansakna

33 TOPA in Moses le Aaron tungah, 34 “Note neih dinga kong piak Canaan leitang ah na lut uh ciangin tua gama inn khatah ap ka na kaisak leh 35 pel loin a inn neipa siampipa kiangah pai-in, ‘Ka inn sungah apkai tawh kibang khat ka mu hi,’ ci-in gen ding hi. 36 Inn sunga na khatpeuh a siang lo-a a pulak khak loh nadingin siampipa, apkai veel dinga a pai ma-in inn sung a hawma a om nadingin thu a pia ding hi. Tua khit ciangin siampipa a sungah lutin veel ding hi. 37 Amah in kawm tunga apkai veel dinga, a-eng pian ahikeh asan pianin ne kuaka, a kawm maitang sahna sangin thuk bunzaw-a, a kilat leh, 38 inn pua-ah siampipa paikhia dinga ni sagih sung tua inn kongkhak a khakcip ding hi. 39 A ni sagih ni-in siampipa in tua inn veel kik ding hi. A apkai pen in kawm tung dang a lawh leh, 40 amah in gial in a sepsa suangtumte kalkhia-in khuanawl a siang lo mun khatah paisak ding hi. 41 Amah in kawm sunglam khempeuh kiatkhiasak tektek dinga, tua a kikiatkhia a zutna themte, khuapua a sianglo mun khatah buasak ding hi. 42 Tua ciangin amaute in hihte suang dangin laih ding uh a, buan thak la-in inn a zut ding uh hi.

43 “Tua inn a, a apkai suangte kilaihkhia a, kikiatkhia in a kizut thak nungin tua inn ah apkai a kilat kik leh, 44 siampipa pai-in veel dinga, a inn sungteng apkai in a zelh leh a siasak thei apkai hi-a, a inn a siang lo ahi hi. 45 Pel loin tua inn - a suangte, a singte le a zutnate phelkhia-in khuapua a sianglo mun khatah kinawnkhia ding hi. ^j

46 “Tua inn a kikhakcip laitaka a sunga lut peuhmah a nitak dong a siang lo hi ding hi. 47 Tua inn sunga a lum ahikeh an ne peuhmah in pel loin a puansilhte uh a sawp ding uh hi.

48 “Ahi hangin siampipa a veel dingin pai-a, a kizut kik zawhin a apkai in mundang a lawh kei leh apkai om nawn lo ahi manin amah in tua inn a siang hi, ci-in a pulak ding hi. 49 Tua inn siansuah nadingin amah in vasa nih le tamtak sing pawlkhat, khau ausan le puknahte a tawi ding hi. 50 Amah in vasa khat leibeel sunga kikoih tuisiang tungah a go ding hi. 51 Tua ciangin tamtak sing, puknah, khau ausan le vasa a hing lai pen la-in tuate a sisa vasa sisan le tui siang sungah diahin tua inn sung sagih vei a theh ding hi. 52 Amah in vasa sisan, tuisiang, vasa a hinglai pen, tamtak sing, puknah le khau ausan-te in tua inn a siansuah ding hi. 53 Tua khit ciangin amah in vasa a hing lai pen khuapua gamlakah khah ding hi. Hici bangin inn adingin thoihdamna bawl dinga tua ciangin a siang ding hi,” a ci hi. ^k

54 Hihte in, a kilawh thei vun natna khatpeuh, cithak, 55 puansilh ahikeh inn tunga ap a kai ciang 56 le a bawk a dulh ahikeh vuntung kang liklek-te tawh kisai 57 a siang le a siang lo ettel cianga zat ding ngeinate ahi hi. ^l

Hihte in a kilawh thei vunnatnate le a apkai tawh kisai ngeinate ahi hi.